25 de abril - 25 a sete vozes

 
 Non quero que pase o 25 de abril sen unha recomendación especial.

Vintecinco a sete vozes de Alice Vieira. Lisboa, Editorial Caminho,1999. 

A historia vaise esluíndo en menos tempo do que imaxinamos; a xente nova (ou non tanto) non lembra ou minimiza a dictadura ou o intento de golpe de estado. Neste libro publicado en 1999 faise o relato de sete persoas de idades, profesións e vivencias diversas, mulleres e homes de tres xeracións que, respondendo ás preguntas sobre a revolución dos caraveis e a celebración do 25 de abril.

As viaxes do príncipe azul

Abril: mes do libro e da lectura; un mes con moitas celebracións.
Este ano non comento novidades, estou aproveitando a ocasión para falar de libros que non quero esquecer, que non deben ser esquecidos.

Hoxe estou a lembrar a historia dun príncipe republicano que quere ser bibliotecario e dos utilísimos agasallos das súa fada madriña: 
1º O poder de ver por debaixo das aparencias das cousas
2º O poder de pensar dúas veces as cousas antes de facelas.
3º O poder do trasacordo, que lle pemitiría reconsiderar as súas decisións sempre e en calquera circunstancia.

Quen nos dera semellante agasallo!!!

Mirade na vosa biblioteca a ver se atopades As viaxes do principe azul, un libro de Darío Xohán Cabana publicado no 1993, en primeira edición, pola editorial Galaxia. que leva xa unha ducia de reedicións.
Agora  están saíndo magníficas iniciativas para que as nenas teñan modelos femininos cos que identificarse, máis aló de princesas Disney, como a colección Antiprincesas. Pero tamén os nenos, os rapaces precisan alternativas aos estereotipo; cómpre,logo, botar a vista atrás e lembrar este libro orixinal e divertido, pero con carga de profundidade.Un libro ben escrito (non podería ser doutro xeito) no que o protagonista quere e pode sair do tópico e buscar o seu camiño, a súa forma de ser e de vivir.  Non da puntada sen fío este noso Darío.
Coido que é un bo momento para presentarllo ao noso alumnado.
    

ÁCIDO SULFÚRICO, AMELIE NOTHOMB

No mes do libro, cada semana unha proposta.

Auschwitz Birkena, de western4uk ,

 No seu momento, trátase dun texto publicado no 2005, pareceume unha temática desagradable e os personaxes planos.

 

Pero hoxe, ao ver como se convirte en espectáculo mediático o sufrimento de persoas que fuxen das nosas guerras e os nosos bombardeos, conducidas pola policía a campos de concentración, coido que é hora de retomar a lectura de Ácido sulfúrico, unha novela de Amelie Nothomb, publicada en castelán por Anagrama en 2007.

Interésame especialmenteo papel dos medios de comunicación e a pasividade da sociedade, o cidadán común que se indigna co goberno e a policía e toma partido por un ou outro dos prisioneiros; pero non fai nada.
 

Por que renunciamos á nosa libertade e aos nosos dereitos e deixamos todas as decisións, todo o poder nas mans dun goberno que non respondo ante os cidadaáns e que depende das grandes empresas?
Non nos vemos, máis ou menos, reflectidos, como sociedade, no libro de Amelie Nothomb?
Que comentaría o noso alumnado de secundaria despois da lectura deste libro?

EL PÁJARO BURLÓN

Mágoa non termos tradución ao galego deste divertidísimo libro de Gerald Durrell.

 

Aínda que non é ningunha novidade, hoxe quero lembrar  este texto que, opino, pode gustar moito ao alumnado dos nosos institutos e dar pé a un traballo interdisciplinar completo e actual.

Como é un libro publicado, pola editorial Alfaguara, en 1981, fáltanlle os móbiles e internet. E digo esto porque é algo do que se vai decatar o noso alumnado. É un libro antigo.

A colonización e a descolonización, as diversas relixións colonizadoras e as súas consecuencias, as relixións autóctonas, o racismo, o poder das grandes empresas, que é un enclave estratéxico e por que, a democracia, o goberno, o papel da prensa (escrita), a economía... e, sobre todo, o medio ambiente. A protección do medio natural que garante o equilibrio e o futuro.

 Gerald Durrell, que dedicou a súa vida á defensa do medio ambiente, reflectiu os seus coñecementos e a súa postura a través da literatura, en libros cheos de humor dirixidos, maiormente, aos lectores máis novos,

BookTubers: multialfabetizacións e literatura.

Booktube é unha comunidade de lectores, polo xeral moi novos e , que, a través dos vídeos de youtube, comparten a súa afección pola lectura, presentan e comentan libros.

En xullo de 2014 o blogue Infotecarios, dedicaba unha entrada ao Fenómeno BookTube.

Rematando o 2015, o fenómeno BookTube xa está aquí; os rapaces e rapazas lectores teñen unha vida social moi activa e influencia na rede. Manexan diversas linguaxes, multialfabetismos, e utilizan as posibilidades que lles facilita a rede para crear contidos e compartilos 

O sistema educativo aínda non o considera, pero hai editoriais que se implican, algunhas canles xa teñen empresas patrocinadoras, anunciantes... Editoras e autores apoian e aproveitan estas novas vías de difusión.

É interesante este artigo de Luciana Monteblanco, que me pasou Nacho Rodiño: Comunidades en red en la Sociedad de la Información: informan, comunican, conectan. El fenómeno Booktube.

Cal é o papel do profesorado como formador de lectores, introductores no mundo da literatura? Temos aínda algo que aportar na formación do lector literario?

CURSO DE BIBLIOTECAS EN COMPOSTELA

Remata o día 30 de outubro, o prazo de inscrición no curso S1501042 Biblioteca escolar, centro de recursos da información. Nivel II. V15 (https://www.edu.xunta.es/fprofe/procesaConsultaPublica.do?DIALOG-EVENT-ver=ver&cod_actividade=66804 ). 

O curso consta de 6 sesións presenciais que se celebrarán na aula 11 do CAFI de 18:00 a 21:00.

Cristina Novoa  (http://www.edu.xunta.es/biblioteca/blog/, https://www.pinterest.com/pin/427842033329269443/ ) falará do modelo de biblioteca escolar do século XXI, conceptos ALFIN e AMI e Proxecto Lector de Centro.

Anna Blasco (http://www.edu.xunta.es/biblioteca/redeBE/course/view.php?id=16, https://www.pinterest.com/becafi/textos-zona-de-carga-e-descarga/ ) desenvolverá o seu relatorio sobre a Competencia Informacional no ensino obrigatorio. 

Contaremos tamén con Begoña López Soto (IES Fernando Esquío de Neda) para falar sobre a xestión informatizada das bibliotecas escolares. 

Isabel Vázquez Rosales (CEIP de Quintela), Ana Seco Orosa (IES Sofía Casanova), Aurora Ramilo (CEIP de Leirado) e Santiago Dans (IES Poeta Díaz Castro) compartiran experiencias en relación ás programacións e á aplicación de estratexias ALFIN no desenvolvemento de proxectos.

Biblioteca escolar, centro de recursos da información. Nivel II

O 23 de novembro comeza en Santiago o curso S1501042 - Biblioteca escolar, centro de recursos da información. Nivel II. V15 . V15 significa versión 15, porque este ano empezamos a revisión e actualización do itinerario formativo de bibliotecas escolares de Galicia.

Contaremos en primeiro lugar con Cristina Novoa porque é un referente internacional e tamén porque é a persoa que coordina os programas de Bibliotecas Escolares de Galicia e quen mellor pode dar pautas de actualización no modelo de biblioteca escolar e sentar bases teóricas de Alfabetización Mediática e Informacional.

http://www.crateru1.educa.aragon.es/Bibliotecas_escolares_e_innovacion_cuadernos_de_pedagogia_0512.pdf

Contaremos ademais con experiencias relevantes como Ana Seco Orosa do IES Sofía Casanova de Ferrol, Begoña López Soto, do IES Fernando Esquío de Neda, Aurora Ramilo do CEIP de Leirado, Santiago Dans do IES Poeta Díaz Castro de Guitiriz (http://biblodiazcastro.blogspot.com.es/) . Quedan aínda dúas sesións por pechar e 15 días para que remate o prazo de inscrición.

RELECTURAS

Cinco anos de guerra e hai pouco máis de cinco días que os medios falan de Siria.
Tamén eu quero falar de Siria a través dun fermosísimo libro do sirio Rafik Schami (Suheil Fadél), que se chama  Narradores de la noche (1993) e que nos acompaña a coñecer  Damasco, as súas xentes e a súa cultura.

 
E xa que estamos, podemos recuperar outro libro marabilloso sobre unha muller que fala co seu futuro neto dos horrores da guerra. Non é Siria, vai sobre a guerra Irán-Irak.
Han cremat el mar (1993), en castelán Han quemado el mar, un libro de Gabriel Janer Manila.

Son dous libros que xa teñen uns aniños, pero que non perderon calidade e actualidade. Cómpre darlles unha relectura, ou unha lectura de non coñecelos de antes. Haiche xente tan nova!

REDES SOCIAIS NO ENSINO

Como se pode traballar en educación en Galicia  obviando o papel das bibliotecas escolares?

No pasado mes de xullo (2015) saiu o número 62 da Revista Galega do Ensino, de Nova Escola Galega; un monográfico, oportuno e ben documentado, sobre Redes Sociais no Ensino coordinado por Adriana Gewerc Barujel, Ana Rodríguez-Groba e Fernando Fraga Varela, do Departamento de Didáctica e Organización Escolar da USC.

Comeza coa noción, a posibilidade, a oportunidade das redes sociais no ámbito educativo. Presentan, pero non explican, a idea de prosumer, o individuo productor e consumidor de contidos en rede do que falou Tíscar Lara no 2102, nas IV XORNADAS DE BIBLIOTECAS ESCOLARES DE GALICIA. Mencionan o concepto de información líquida, da cultura 2.0 ou 3.0.

Especialmente interesante, na miña opinión, é o artigo REDES SOCIAIS NAS AULAS de Esther  Fernández Pérez, que analiza de xeito claro, conciso e práctico o tipo de rede a utilizar no ensino, as súas características e posibilidades. Tamén me pareceu relevante a presentación da plataforma  Edu-AREA (Manuel Caeiro Rodríguez) e da rede social do profesorado, Redeiras (Alejandro Rodríguez Quintana e Juan Menéndez Rocha).

Repito: un número moi necesario, pero...

As bibliotecas escolares non se mencionan en todo o número.

Parecen esquecer (ou ignorar) o papel , imprescindible, das bibliotecas escolares na innovación metodolóxica, como centro de recursos para a lectura, a información e a aprendizaxe; para o acceso á información; no desenvolvemento de proxectos interdisciplinares; na adquisición da Alfabetización Informacional (ALFIN) ou Mediática e Informacional (AMI).

É boa mágoa un tal descoñecemento, por parte destes profesionais, da exemplar rede de bibliotecas escolares de Galicia e do magnífico labor que realizan.

Pablo Gentili e o zapato perdido.

Catro meses levo sen pasar por aquí. Moito traballo, pouco tempo, outros medios...
Sempre que leo ou escoito a Gentili, sinto desexo de compartilo e comparto no facebook, pero non é o mesmo.
Pablo Gentili (Bos Aires, 1963) é un dos máximos expertos mundiais en educación e inclusión social. Na actualidade é Secretario Executivo do Consello Latinoamericano de Ciencias Sociais (CLACSO) e profesor da Universidade do Estado de Río de Janeiro (Brasil). Coordina o Observatorio Latinoamericano de Políticas Educativas e foi un dos fundadores do Foro Mundial de Educación, iniciativa do Foro Social Mundial. Mantén o blogue Contrapuntos do que son seguidora.
Levo tempo cavilando sobre un seu artigo, "La exclusión y la escuela: el apartheid educativo como política de ocultamiento" (revista Docencia nº 15), que me deixou moi impresionada e que analiza o papel da escola na exclusión social a partir dun zapatiño perdido. Casualmente topeime hoxe cunha presentación en YouTube, texto e audio (non é a súa voz) Coido que o mellor e compartila 
 
Con este breve vídeo podemos facernos unha idea de como é e como pensa.